બોટાદના લોક વિજ્ઞાન કેન્દ્ર ખાતે રાષ્ટ્રીય અવકાશ દિવસની ઉજવણી કરવામાં આવી હતી. આ નિમિત્તે એક સ્પેસ ક્વિઝનું આયોજન કરાયું હતું, જેમાં જિલ્લાની અંદાજે 22 શાળાઓના 411 વિદ્યાર્થીઓએ ઉત્સાહભેર ભાગ લીધો હતો.ક્વિઝમાં વિજેતા બનેલા વિદ્યાર્થીઓને અમદાવાદ સાયન્સ સિટીની નિઃશુલ્ક મુલાકાત માટેના વાઉચર આપવામાં આવ્યા હતા. આ કાર્યક્રમનો મુખ્ય હેતુ વિદ્યાર્થીઓને અવકાશ વિજ્ઞાન પ્રત્યે જાગૃત કરવાનો હતો.કાર્યક્રમ દરમિયાન વિદ્યાર્થીઓને ચંદ્રયાન-3 મિશન વિશે વિસ્તૃત માહિતી આપવામાં આવી હતી. ઉપરાંત, રાષ્ટ્રીય અવકાશ દિવસ શા માટે ઉજવવામાં આવે છે અને તેનું મહત્વ શું છે તે વિશે પણ માહિતગાર કરવામાં આવ્યા હતા.આ કાર્યક્રમનું આયોજન શ્રી સ્વામિનારાયણ શિક્ષણ સેવા સમિતિ લોક વિજ્ઞાન કેન્દ્ર-બોટાદ દ્વારા, ગુજરાત કાઉન્સિલ ઓન સાયન્સ એન્ડ ટેકનોલોજી, ગાંધીનગરની પ્રેરણાથી કરવામાં આવ્યું હતું. બોટાદ જિલ્લા શિક્ષણ અને તાલીમ ભવનના પ્રાચાર્ય દીપકભાઈ ચૌહાણ, ડિરેક્ટર માધવસ્વરૂપદાસજી સ્વામી અને સેક્રેટરી મુકેશભાઈ કાનેટીયા મુખ્ય મહેમાન તરીકે ઉપસ્થિત રહ્યા હતા.સમગ્ર કાર્યક્રમનું સંચાલન લોક વિજ્ઞાન કેન્દ્રના કો-ઓર્ડીનેટર હરપાલભાઈ સોલંકી, ઇન્ચાર્જ પ્રતાપભાઈ સોલંકી અને આઈ.પી. તથા ઇનોવેશન લેબના આઈ.પી. ઓફિસર ક્રિષ્નાબેન કળથીયા દ્વારા કરવામાં આવ્યું હતું.